ЖРК Вардар се пласираше на завршниот турнир на најдобрите четири екипи во Купот на Македонија. Во финалниот натпревар во групата Г, нашиот тим вечерва издвојува победа против екипата на ЖРК Пелистер. Натпреварот кој се одигра во салата „Круме Кепески“ заврши во наша корист со резултат 34:21 (12:8).

Заслужена победа за избраничките на Платон и Кузмановска, кои не дозволија ниту во еден момент противникот да се понадева на победа. Натпреварот со погодок го отвори Јасмина Попова, за после 8.минути игра, тренерот на гостите да биде принуден да побара тајмаут, откако со два последователни голови на Леона Миленкоска, имавме водство од 4:1. Во еден момент, екипата на Пелистер намали на 6:4, но ние вративме преку Богојеска и Миленкоска, за највисоки четири гола разлика.

На нашиот гол започна Вероника Ѓорѓиевска, која беше одлична, завршувајќи го натпреварот со двоцифрен број на одбранети удари. До крајот на првиот дел, ја зачувавме предноста од четири гола, па на кратка пауза се замина со резултат 12:8.

Првиот гол за нас во вториот дел беше дело на Сара Богојеска за резултат 13:9. Како одминуваше натпреварот, растеше разликата во наша корист, па после 40 минути игра откако погоди Нина Попова, имавме високи 19:12 водство.

Платон даде шанса на речиси сите ракометарки, кои денес беа на располагање. На голот застана и Андреа Илиќ, која исто така имаше одбрането зицери на противникот. На седум минути пред крајот, погоди Нина Неделковска за резултат 27:20 и веќе беше јасно кој ќе се пласира на завршниот турнир. До крајот, само ја зголемивме предноста, за конечен резултат од 34:21.

Најефикасни во нашите редови беа Миленкоска и Богојеска со по 7 постигнати голови. На голот, Ѓорѓиевска се истакна со 10 одбрани, додека Илиќ запиша 5 интервенции.

Вардар: Ивона Кимовска 3, Јасмина Попова 1, Дона Тодоровска 4, Нина Попова 4, Нина Неделковска 2, Марија Голабоска 3, Михаела Велјаноска, Андреа Илиќ ( 5 одбрани ), Сара Богојеска 7, Леона Деметра Франгоска, Бојана Радевска 2, Ивана Смилевска 1, Леона Миленкоска 7, Вероника Ѓорѓиевска ( 10 одбрани ), Нина Милевска, Дафина Соколовска.