Младинките на Вардар го добија натпреварот од 14.првенствено коло против екипата на Ѓорче Петров. Натпреварот кој се одигра во салата „Круме Кепески“ заврши во наша корист со резултат 31:24 (16:13).

Во првите 20.минути не се одвиваше најдобро натпреварот за нас. Првиот гол го постигнавме во 4.минута, додека првите три гола за нас ги постигна Леона Миленкоска, за резултат 3:5 по 7 минути игра. На нашиот гол, две одбрани сврза Хасаноска, но Ѓорче имаше предност од 3:6, по што Платон побара минута одмор. Благодарение на неколку одбрани на противничкиот голман, екипата на Ѓорче Петров, се одлепи на највисоки шест гола предност (3:9).

Ние во неколку обиди немавме среќа, кога ја погодувавме пречката или стативата од противничкиот гол, а тоа гостинките немилосредно го казнуваа. Лошата серија ја спречи Дона Тодоровска кога намали на 4:9 во 15 минута. Екипата на Ѓорче Петров повторно ја врати онаа највисока предност од шест гола, кога резултатот на семафорот гласеше 6:12.

Од тој момент на теренот играше само една екипа, тоа беше Вардар, кој до крајот на првото полувреме успеа да направи серија од 10:1 и на одмор да замине со три гола позитива. Елена Балоска беше расположена во нашите редови, потпомогната од Миленкоска, но и од Хасаноска и со добрата одбрана во тој период, успевавме полека да ја топиме негативата.

После резултат 9:12, гостинскиот тренер побара тајм-аут, но тоа не го спречи налетот на вардарки, кои со два последователни голови на Ивана Трифуноска го израмнија резултатот на 12:12 во 25 минута. Набргу стигна и првата предност за нас, откако погоди Јана Поповска за водство од 13:12, додека Дона Тодоровска се погрижи да продолжи нашата серија. На полувреме се замина со резултат 16:13, откако Миленкоска со силен и прецизен удар ја погоди мрежата на противникот.

Избраничките на Платон продолжија со силно темпо на игра и во вториот дел, а играта на Ѓорче Петров целосно се распадна. Противникот првиот гол во вториот дел го постигна во 40.минута, за да намалат на 22:14. Хасаноска беше одлична на нашиот гол, а ние погодувавме во нападот. Стигна и двоцифрената предност, кога во 44 минута, Мила Ристовска погоди за 24:14.

Беше познато кој ќе ги освои бодовите на овој натпревар, во продолжение од мечот, нашиот стратег им даде шанса за игра на сите ракометарки. До крајот, Ѓорче Петров го ублажи поразот, за конечни 31:24 на овој натпревар од младинската лига.

Вардар: Ивана Трифуноска 7, Дона Тодоровска 4, Сара Ристовска, Елена Балоска 6, Бојана Божиновска, Јана Стојанова, Мила Ристовска 3, Симона Миноска, Леона Деметра Франгоска, Драгана Тодоровска 1, Мила Николовска 1, Мила Манева, Јана Поповска 2, Леона Миленкоска 7, Јована Павичевиќ, Зорица Хасаноска.